O Aldasa Amfiv aproveitou a fin de semana sen competición na División de Honra de baloncesto en cadeira de rodas pola disputa das fases previas europeas para celebrar un encontro amigable ante o APD Paredes, un conxunto luso de recente creación.

A diferenza de potencial entre un equipo que está a iniciarse aínda no baloncesto adaptado e outro coa tradición do Amfiv, que esta tempada celebra o seu trixésimo aniversario, quedou patente xa dende o asubío inicial.

Con todo, a cita resultou moi positiva para o adestrador vigués Julio Bernárdez, que aproveitou para repartir moito o protagonismo e premiar especialmente aos xogadores que ata o momento estaban dispondo de menos minutos durante a campaña para intentar que todos os seus pupilos estean a lume de biqueira e plenamente integrados na dinámica de xogo nesta recta final de tempada.

O vindeiro día 14, mércores, o Celta Bosco pode celebrar a súa salvación de forma matemática.

A dúas xornadas para o final do campionato (tres para celestes e pamplonicas, que teñen un partido aprazado ante rivais de Euroliga), as de Carlos Colinas encamiñaron a salvación tras o seu último triunfo fronte a La Seu (64-53) e pola derrota de Obenasa en Pamplona (90-94) contra o Sóller este venres logo dunha prórroga.

O mércores, no Multiusos de Navia (21:00 horas), as viguesas salvaranse se gañan... ou sempre que o Obenasa navarro caia media hora antes no polideportivo Arrosadía fronte ao Ros Casares valenciano, o único equipo que non perdeu un só partido no torneo regular esta tempada.

O Academia Octavio é o protagonista absoluto da campaña desta semana da Fundación VIDE. Baixo o título "Paixón polo balonmán", a publicidade anuncia o encontro Octavio-Barcelona deste mércores.

Porque hoxe recibe o sete académico ao FC Barcelona Intersport en partido da Liga Asobal (20:30 horas, As Travesas). O conxunto vigués, que está realizando unha gran primeira volta no seu regreso á máxima categoría, recibe ao equipo azulgrana, colíder do campionato e vixente campión de Europa.

 Con todo, os de Pasqui, exporteiro do Octavio, non teñen boa lembranza das súas últimas visitas ao Central: en 2010 perderon en Vigo a final da Copa Asobal (contra Cidade Real) e este ano caeron en semifinais da Copa do Rei no mesmo escenario (ante o Valladolid).