O boom das carreiras populares continuará en marzo, cando a tempada de ruta comece xa con forza en Vigo.

A delegación viguesa da Federación Galega de Atletismo comunicou xa varias probas populares que estarán baixo a súa supervisión en 2012.

Así, tras a exitosa I Correndo por Vigo, en Travesía de Vigo o domingo pasado, en marzo disputarase a carreira da Universidade (10 km Cidade Universitaria), fixada para o 11 de marzo, e a Media Maratón Vig-Bay, para o 25 de marzo. Outras probas en ruta previstas para este ano e con data calendada son a Carreira de San Xoán (sempre o 23 de xuño) e a sexta edición da Vigo+11 (14 de outubro).

Con todo, a relevancia deste tipo de retos atléticos non só é notoria polo número de participantes, que crece de forma exponencial estes anos, senón tamén pola entrada con forza dos patrocinios das grandes áreas comerciais nestas competicións nas que federados e populares mestúranse. de feito, El Corte Inglés apoia a Carreira da Muller, a Vigo +11 e o Gran Premio de Nadal (a Carreira do Pavo), sendo o centro comercial con maior aposta no atletismo. O Centro Comercial Gran Vía envórcase coa Subida ao Castro, que lle colleu gusto ao mes de decembro; a creación da Correndo por Vigo levou que o Centro Comercial Travesía entre tamén de cheo no mundo do deporte.

Á espera de que a Concellería de Deportes anuncie a cuarta edición do Circuíto Cidade de Vigo de carreiras populares, que se coñecerá durante o acto de entrega de premios da edición do 2011, o programa de carreiras en ruta está tamén á espera das datas oficiais doutras probas como a Media Maratón Cidade de Vigo ou os 10 km Xornadas Marisqueiras do Berbés.