As mellores canteiras do fútbol sala español visitarán Lugo con motivo da celebración do VIII Torneo de fútbol sala de base “Cidade de Lugo” que organiza a Fundación Azkar e que se disputará do 26 ao 28 de decembro e do 2 ao 4 de xaneiro. Este ano seguen acudindo equipos da talla do Playas de Castellón, Marfil Santa Coloma, O Parrulo de Ferrol e Burela FS, entre outros, e a gran novidade será a de que o FC Barcelona con dous equipos tamén confirmou a súa asistencia.

O Torneo como cada ano disputarase en dúas fases: a primeira do 26 ao 28 de decembro cunha fase máis a nivel local e na que participarán equipos de Lugo, a súa provincia, e das tres restantes provincias galegas. Na segunda, do 2 ao 4 de xaneiro, xa entrarán en liza os equipos invitados pola organización ademais dos equipos que se clasificarán da primeira fase (o campión de cada categoría).

Masculino e feminino
Como xa ocorrera na edición anterior, este ano tamén se disputará a categoría feminina cadete, na cal participarán 6 equipos (segunda fase). Na masculina, participarán 64 equipos, na primeira fase, e 32 na segunda. As categorías masculinas son: benxamín, alevín, infantil e cadete.

Equipos de luxo A segunda fase do Torneo un ano máis será de auténtico luxo. Chama a atención especialmente a participación do FC Barcelona xa que este ano o conxunto culé poderá participar no torneo con dous equipos (infantil e cadete). Ademais acudirán ao torneo o Playas de Castellón, Marfil Santa Coloma, Futsal Madrid, Ciudad de Toledo, EFS Fair Play de Extremadura, Amanha da Criança (Portugal), O Parrulo Ferrol, Vigo 2015, Club del Mar Sanamaro, Mare Nostrum e Burela FS. A estes equipos haberá que sumarlle ao campión da primeira fase de cada categoría.

Datos importantes
O Torneo adquiriu xa o cartel dos máis importantes do panorama español e non é para menos debido ao gran nivel de participación. Ademais coincide nunhas datas, as do Nadal, nas que os nenos teñen máis tempo libre e investilo en deporte é unha boa opción ademais de ser saudable. Durante os seis días de competición, sumando as dúas fases, en total participarán 96 equipos chegando así ata os preto de 1200 xogadores/as competindo, con catros pistas de xogo simultáneas, e cunha importante laboura loxística que achega a Fundación Azkar e o Azkar Lugo FS para que este torneo se leve a cabo.