Obxectivo cumprido. O Bembrive F.S. sabía que necesitaba gañar en As Pontes para concluír a tempada na segunda posición e o fixo con solvencia e autoridade a pesar dos nervios típicos ao comezo do choque. O triunfo permite ao novo conxunto de Pitu rematar unha campaña histórica cun brillantísimo subcampionato que supón tamén a clasificación para disputar a próxima campaña tanto a Copa do Rei como a Copa Xunta.

A segunda praza podería mesmo ter un premio engadido posto que a renuncia do Cidade de Narón a participar no play-off de ascenso á Segunda División podería abrir a porta a que os vigueses pelexen por ascender.

Para iso, o Bembrive necesitaría que algún outro conxunto renuncie tamén e saber despois se a Liga Nacional de Fútbol Sala invitaría a participar aos segundos clasificados deses grupos -co que o Bembrive tería praza segura no play off- ou os elixidos serían os dous mellores segundos dos seis grupos da Segunda División B. Nese caso habería xa que sacar a calculadora e ver coeficientes para saber que sucedería.

De tódolos xeitos, no conxunto vigués vívese a situación con moita calma. "Non falamos aínda diso porque non é máis que unha posibilidade e aínda non hai nada claro. Unha vez que nos avisen, se sucede, veremos que facemos. Haberá que estudar o tema económico e ver tamén o deportivo. A verdade é que para nós sería outro premio máis. Estes rapaces meréceno todo. As nosas expectativas non se achegaban a isto ao iniciar a tempada. Esperabamos estar arriba pero pensabamos que con catro ou cinco equipos da categoría que pagan e ben non iamos poder competir xa que os nosos xogadores mesmo teñen que poñer diñeiro do seu peto para vir a adestrar", resalta Pitu.

Todo isto chega despois dun brillante triunfo na cancha de O Esteo, nun partido que se complicou aos dous minutos cando o Bembrive se atopou cun gol en contra. Os locais, moi relaxados xa que non se xogaban nada, aproveitaron os nervios dun equipo visitante que non estaba centrado e confundiu de inicio a aposta por levar o control do partido cun ritmo de xogo pausado e lento. Non obstante, tampouco tardaron en exceso os vigueses en espertar, en boa medida esporeados polo golpe recibido, e unha boa acción colectiva permitiu a Jacobo empatar moi pronto e evitar males maiores. Ademais, os pupilos de Pitu estaban a mostrar unha extraordinaria puntaría ante a portería rival, materializando en gol practicamente cada ocasión que xeraban. Todo o contrario que un desafortunado equipo local, que desperdiciou ocasións moi claras e viu como un tanto de Nené a escasos segundos para o intermedio deixaba o partido case listo para sentenza (2-5).

Por se fose pouco, o Bembrive saíu máis centrado na segunda metade, parecéndose xa moito máis ao equipo que tan bos resultados estaba a obter esta tempada. Esa marcha máis permitiu a Mario lograr o 2-6 e ao seu equipo controlar por completo o partido. O Esteo tivo un intento máis de pelexar o encontro cando con 3-7 optou por buscar a remontada con porteiro-xogador pero Borrajo anotou o 3-8 para abortar calquera problema e Nené pechou a conta nos instantes finais cun bonito gol de vaselina.

O ESTEO - BEMBRIVE FS 3-9
O Esteo: Iván, Rober Paz, Héctor, Rubi, Gerardo -cinco inicial-, Pablo, Diego Pellón e Bolly.
Bembrive: Cuca, Berni, Jhony, Jacobo, Gesteira –cinco inicial-, Mario, Nené, Borrajo  e Míchel.
Goles: 1-0, min.2: Rubi; 1-1, min.3 Jacobo; 1-2, min.8: Nené; 1-3, min.13: Nené; 1-4, min.14: Gesteira; 2-4, min.15: Rober Paz; 2-5, min.20: Nené; 2-6, min.21; Mario; 3-6, min.31; Rubi; 3-7, min.31: Borrajo; 3-8, min.32: Nené; 3-9, min.40: Nené.
Incidencias: Encontro correspondente á última xornada no Grupo I da Segunda División B de fútbol sala.