O Celta Indepo presentou a súas dúas novas fichaxes estranxeiras desta tempada, Michulkova e Kooij.

A eslovaca Luisa Michulkova (Zilina, 1984, 1,77), procedente do Good Angels Kosice, e a holandesa Leonie Kooij (Dean Helder, 1986, 1,88), do HLB Accountants Dean Helder, acaban de disputar o Preeuropeo, con clasificación daquela para o Eurobasket de 2011.

O vicepresidente Carlos Álvarez e o adestrador Miguel Méndez compareceron ante os medios de comunicación na Fundación VIDE coas xogadoras internacionais. Méndez achegou a ficha técnica das dúas xogadoras para subliñar a continuación que a fichaxe que máis expectación xera é a de Kooij, porque "quero que xogue no posto de tres e no seu país xogou de catro". Tras a saída de María Pina, o adestrador vigués de Liga Feminina necesitaba unha aleira alta e decidiuse por Kooij, con gran facilidade para anotar dende os 6,25 metros (6,75 a partires de agora).

Preguntada por se chega ao Celta como estación de paso, a holandesa dixo estar "moi contenta" na cidade e co visto ata agora, non expóndose polo momento o futuro. "Acabamos de chegar, a primeira impresión é moi boa e non me expoño nada máis; se todo vai ben...".

Michulkova, pola súa banda, afirmou que está "gozando cos adestramentos" mentres "tento coñecer ao adestrador", declaracións que arrincaron un dobre sorriso a Miguel Méndez, que non dubidou, entre bromas cómplices, en manifestar a súa satisfacción polas declaracións da súa nova xogadora. Michulkova coñece a liga española "de internet, de xogar contra Rivas e Ros Casares".

Na imaxe, un intre da rolda de prensa na Fundación VIDE, con Miguel Méndez, Michulkova, kooij e Carlos Álvarez. Na foto superior, Méndez, coas súas novas xogadoras na entrada do IMD.