O conxunto vigués, que a pasada fin de semana non puido disputar o seu choque ligueiro ante o Econy Gran Canaria a non poder desprazarse os insulares a Vigo polos problemas aéreos ocasionados pola nube de cinza volcánica, retoma este sábado en Bouzas a competición (18.30 horas) ante un equipo maño en plena progresión.
Tras o subidón de adrelina do subcampionato europeo logrado o 25 de abril en Xenebra (Suíza), o Aldasa Amfiv, case un mes despois, poderá á fin celebralo cos seus afeccionados no seu regreso á competición liguera. Porque o conxunto de Abraham Carrión se reatopará coa División de Honra de baloncesto en cadeira de rodas este sábado no Pavillón de Bouzas (18.30 horas). Será co CAI Zaragoza como rival e sete días despois da data prevista inicialmente polos vigueses para o seu regreso á competición. A nube de cinza volcánica provocou que o Econy Gran Canaria non puidese desprazarse o pasado sábado a Vigo para afrontar o choque da décimo novena xornada, co que os pupilos de Abraham Carrión prolongaron unha semana máis o seu xa amplo parón.
Precisamente, esa é unha das principais preocupacións do técnico do Aldasa de cara ao seu reencontro coa División de Honra. "É un partido moi importante para nós pero bastante complicado polo feito de levar dúas semanas parados, sen competir, e tres sen facelo en liga. Esa situación provoca que baixe a tensión e que non saibamos se o traballo da semana dará os seus froitos nos momentos complicados", explica Carrión sobre o partido ante o CAI Zaragoza, un rival que variou notablemente respecto ao que os vigueses visitaron na primeira volta.
"Dende que nos últimos meses incorporou ao iraniano Torfi, o CAI só perdeu dous partidos e ambos os dous por moi poucos puntos, gañando mesmo a equipos como o Econy Gran Canaria e o Fundación Grupo Norte de Valladolid", precisa o adestrador do Amfiv, que non se fía dun conxunto maño que abandonou a última posición e que cun balance de 19 triunfos e 4 derrotas ten a tiro a permanencia unha campaña máis na División de Honra.
Renacer do CAI ten un nome propio: Torfi. "É un anotador nato, que chegou para reforzar a faceta ofensiva do equipo. Ademais, como as defensas se pechan moito sobre el, xera espazos para os veteranos, xogadores que antes pasaban desapercibidos e que agora adquiriron un papel bastante importante,", puntualiza Carrión.
Para combater a nova arma ofensiva dos zaragozanos, o adestrador do Aldasa aposta por manter un discurso moi parecido ao esgrimido ante outros rivais como o Econy Gran Canario. "Intentaremos impoñer o noso ritmo porque cun ritmo de xogo alto conseguiremos que os seus xogadores importantes non poidan render ao seu nivel. Ademais, trataremos de cargalos de faltas porque cando teñen que rotar o banco, o seu nivel baixa moito", explica Carrión, quen destaca que "chegamos con todo o equipo ben e ao cen por cento. A pesar de que David Mouriz estivo renqueante durante a semana, o xoves xa puido adestrar con normalidade".