O sucedido en Nörrkoping aínda pesa na mente dos xogadores de César Iglesias. A non clasificación do Amfiv por primeira vez en sete anos para unha fase final europea deixou tocado o conxunto vigués, que tiña postas moitas ilusións, como sempre, nas competicións continentais.
Tres subcampionatos da Copa Willi Brinkmann converteran ao Aldasa nunha referencia ata colocalo entre os quince mellores do ranking europeo e, polo tanto, disputar a Euroliga 1. Nembargantes, o conxunto vigués asinou unha pobre actuación en terras suecas debido en boa parte aos desacertos duns xogadores que maioritariamente non renderon ao nivel esperado pero tamén en boa medida polo potencial dos rivais. Aínda así, a clasificación para a Willi Brinkmann rozouse coa punta dos dedos no triplo final ante o Toulouse de Lorenzo Envó que non quixo entrar. Os vigueses caeron 59-57 e aí empezaron a despedirse de Europa esta tempada.
Pero non hai tempo para lamentacións. O calendario, moitas veces cruel, móstrase agora solidario co Amfiv brindándolle xa este sábado unha interesante oportunidade de reconciliarse consigo mesmo e cos seus afeccionados. Volve a División de Honra de baloncesto en cadeira de rodas. Será a décimo sexta xornada. Os vigueses reciben o cuarto clasificado, o CID Casa Murcia Getafe, que acumula un balance de 11 triunfos e só 4 derrotas, coa intención de que os madrileños paguen os pratos rotos en Europa (18.00 horas).
Non se trata dunha tarefa sinxela. O CID Casa Murcia Getafe, cun anotador compulsivo nas súas filas como o experimentado Turek, ocupa a cuarta praza por méritos propios. Na ida, o encontro non se decidiu ata o último cuarto (50-42). Este sábado, os pupilos de César Iglesias confían en que a súa afección responda unha vez máis e que o Pavillón de Bouzas lles leve en volandas cara a un importante triunfo para esquecer definitivamente o sucedido en Norrkoping e centrarse nesta recta final da tempada, con importantísimas citas como a Copa do Rei que se celebrará en apenas sete días en Marbella.
Para buscar a implicación dos seus seguidores, os dirixentes do Amfiv idearon unha nova campaña de promoción que sucede á realizada a primeiros de ano na cal eran os propios xogadores os que pagaban do seu peto as entradas de todos aqueles afeccionados que acudisen ao pavillón. Nesta ocasión, tendo en conta que este sábado 19 de marzo se celebra o Día do Padre, os responsables do conxunto vigués decidiron que os pais que acudan cos seus fillos a animar ao Amfiv neste importantísimo compromiso ante o CID Casa Murcia Getafe terán, ambos os dous, a entrada gratuíta.
José Antonio Beiro, director deportivo do club e impulsor desta iniciativa, explica que "sabemos que a moral do equipo está tocada e que non hai tempo para recuperarse. Por iso, buscamos que a bancada achegue as forzas necesarias ao Amfiv para levantarse unha vez máis e mostrar os valores que nestes case trinta anos de historia converteron á nosa entidade nun referente por o seu incansable capacidade de loita e sacrificio. Pode que non teñamos o mellor equipo nin aos xogadores con máis talento, calidade ou centímetros pero si estamos convencidos de que cada xogador que se pon a nosa camiseta non escatima nin unha gota de suor para pelexar pola vitoria. Así foi sempre e así queremos que volva ser. E para conseguir a reacción que desexamos dos xogadores é vital o apoio da bancada. A cita meréceo e estamos seguros de que o público estará connosco unha vez máis neste delicado momento".
