"A verdade é que non foi unha semana boa de traballo. Á xente, como é normal, fíxolle bastante dano a nosa eliminación europea. Ademais, non puidemos dar descanso e o martes tivemos que volver aos adestramentos e aos xogadores custáballes centrarse no traballo.
Estamos a pensar máis na fin de semana pasada que no que vén agora e o pasado, pasado está". Así resume César Iglesias, técnico do Aldasa Amfiv, a semana posterior á participación dos vigueses na euroliga 1 hai apenas sete días na localidade sueca de Norrkoping.
Sen dúbida, malas noticias cando o conxunto olívico non ten tempo para lamentarse xa que este sábado ás 18.00 horas recibe o CID Casa Murcia Getafe, cuarto clasificado, na décimo sexta xornada da División de Honra de baloncesto en cadeira de rodas.
Afortunadamente, non todo é negativo para o Aldasa. Hai luz ao final do túnel. "Malia todo, esta semana tamén tivemos unha nota positiva. Julio Vilas xa volveu adestrar co grupo en todas as sesións e o sábado no partido imos probar como está", subliña César Iglesias, quen contou con outra importante axuda para as sesións de traballo desta semana: a nova xogadora australiana Shelly Cronau, que se atopa en Vigo visitando a Agustín Alejos. "A presenza de Shelly axudounos tamén a mellorar o nivel, achegando unha competitividade que antes non había,", recalca o técnico vigués.
Iglesias tivo que dedicar a semana case máis a exercer de psicólogo que de adestrador. "Nunha semana así toca tirar do carro, animar á xente e falar ao final dos adestramentos se o traballo non estivo ben. A charla final do adestramento do xoves foi nesa liña. O venres demos descanso pero pedinlles aos xogadores que se paren un momento a facer unha reflexión e a pensar que nos queda bastante por diante. Non se remata o mundo, nin un proxecto nin un equipo por perder en Europa. De feito, se a próxima semana en Marbella facemos unha grande Copa do Rei e conseguimos alcanzar unha hipotética final aínda sería unha boa campaña para o club. É evidente que as cousas non saíron como pensabamos pero hai que seguir e mirar cara a adiante. A tempada non remata polos catro partidos que xogamos en Norrkoping", reflexionan Iglesias.
No seu regreso á División de Honra de baloncesto en cadeira de rodas, os vigueses terán un óso duro de roer como é o CID Casa Murcia Getafe, actualmente cuarto na táboa cun balance de once vitorias e unicamente catro derrotas. Pola contra, o Amfiv é sexto cun saldo de seis triunfos e nove encontros perdidos. De momento, os pupilos de César Iglesias non ocupan unha posición perigosa na clasificación pero non poden confiarse aínda. O Amivel, penúltimo con só tres vitorias, marca o descenso e os malagueños reforzáronse para buscar a permanencia. Nese sentido, Iglesias non pensa en que o Aldasa poida pasar apuros. "Temos aínda que enfrontarnos a todos os equipos de abaixo. Se nos metemos en problemas é porque nolos buscamos. De tódolos xeitos, debemos sacar canto antes vitorias ante adversarios directos. Ademais, todo o que sexa sumar fronte a equipos da zona de arriba como Getafe será positivo e nos axudará máis a ampliar a brecha", puntualiza.
Na primeira volta, o Amfiv xa tivo nas súas mans derrotar aos madrileños, que finalmente se fixeron coa vitoria por un axustado 50-42. "É un equipo que basea o seu xogo fundamentalmente nun excelente tirador sobre todo dende a zona esquerda e tras pantalla como é Turek e nun xogador interior moi grande como Jason Walley que domina o rebote nas dúas canastras. Así, aínda que o acerto baixo o aro non é o seu forte, permite segundas opcións ao seu equipo e achégalle moita intensidade dentro da zona", analiza César Iglesias, quen recorda que "alí o partido se decidiu nos dous minutos finais. Penso que se controlamos eses dous xogadores e nós temos unhas porcentaxes de tiro xa non boas se non normais, teremos opcións de facernos co partido".
Os pais, gratis
Para este sábado (18.00, Bouzas), os responsables do Amfiv puxeron en marcha unha nova iniciativa para tratar de que o pavillón vigués presente o mellor aspecto posible e apoie o seu equipo nesta importante cita. Deste modo, ao coincidir o encontro co Día do Padre, os dirixentes do Aldasa decidiron que todos aqueles pais que acudan ao choque acompañados polos seus fillos terán a entrada gratuíta.
"É unha boa iniciativa porque o público sempre é importante", agradece o técnico vigués, que desexa que "ogallá haxa unha boa asistencia". Non obstante, Iglesias pensan que a bancada será importante pero non decisiva para que o equipo esqueza a decepción sufrida a pasada semana e se centre no presente. "Penso que estamos nunha situación que ten que sacar máis o equipo adiante que o público. Ademais, en xeral, os afeccionados españois métense nos partidos en función do que faga o equipo primeiro. Por iso, primeiro temos que demostrar nós que estamos aí para logo esperar o alento e o pulo da nosa bancada".