Julio Bernárdez e Óscar traballo xa teñen un novo xogador para empezar a traballar o próximo 15 de setembro, data na que iniciará a pretempada o Aldasa Amfiv 2011-2012.

Unha vez pechadas as renovacións dos xogadores que da pasada campaña que seguirán no equipo e conformado o corpo técnico que dirixirá ao conxunto vigués, os esforzos do director deportivo, José Antonio Beiro, a centrar en completar a nómina de xogadores que terán ás súas ordes Bernárdez e Carbajo.

E as noticias non tardaron demasiado en chegar porque, como xa anunciara o propio Beiro na presentación dos novos adestradores, había xestións moi avanzadas. É o caso do mozo ala-pívot vasco Txema Avendaño, quen acaba de converterse oficialmente na primeira incorporación do Aldasa Amfiv para a próxima campaña.

Avendaño, quen se atopa xa en Vigo dende hai uns días, pertence a unha das xeracións máis prometedoras do baloncesto en cadeira de rodas nacional. Dous veces campión de Europa sub-22 (2006 e 2008) e subcampión do Mundo sub-22 (2009), aos seus 23 anos e despois de sete practicando este deporte atesoura unha grande experiencia. Ademais, conta no equipo vigués con varios coñecidos que farán máis rápida a súa adaptación á cidade e ao equipo, posto que na súa etapa no Barcelona coincidiu con David Mouriz, Bernabé Costas e Julio Vilas. Precisamente, con Vilas compartiu vestiario tamén na selección española sub-22 que gañou o Europeo de 2006.

Eles, precisamente, foron decisivos para que Avendaño, que se atopaba sen equipo tras a desaparición do Fuhnpaiin Peraleda toledano, conxunto co que pelexou por facerse co título ligueiro a pasada campaña, aceptase a oferta viguesa. "Ademais da proposta do Amfiv tiña outra bastante boa enriba de la mesa. Como coñecía a David, Berni e Julio e sempre me falaran moi ben do Amfiv non foi moi difícil decidirme a vir aquí", explica o xogador clase 4.

Respecto ás súas expectativas de cara ao próximo inicio da tempada, Avendaño ten claro que o seu primeiro obxectivo é "a nivel persoal, contar con máis continuidade da que tiven en Toledo para seguir mellorando e aprendendo, tanto dos adestradores coma dos compañeiros". Pero tampouco lle esquece a importancia do grupo. "A nivel colectivo, espero que poidamos facer un bo ano, dar a cara en todos os partidos e mellorar os resultados conseguidos polo equipo a campaña pasada", puntualiza.

A chegada dun corpo técnico novo iguala a hipotética vantaxe coa que poderían contar os xogadores que xa formaban parte do equipo a anterior tempada. "Nun principio, todos partimos de cero e iso favoréceme pero tamén me gustase adestrar ás ordes de César Iglesias porque me falaron moi ben del e creo que encaixaba nos seus conceptos tanto defensivos como ofensivos. O que está claro é que cun adestrador ou con outro sempre hai que traballar para gañar o posto", subliña o ala-pívot bilbaíno.

Iso si, contar cun corpo técnico que procede do baloncesto a pé será novidade para Avendaño, aínda que non lle supón ningún problema. "Penso que vai ser unha experiencia positiva porque seguro que veñen con moitas ganas de aprender e de ensinarnos a nós posto que hai conceptos do baloncesto a pé que nos poden vir moi ben. Supoño que sería bo que ao principio, xa que son un pouco novatos, se deixen aconsellar", apunta Avendaño, que xa se formou unha primeira impresión da cidade. "Acostumado a Toledo, vexo que Vigo é bastante grande, máis ou menos como Bilbao. Hai de todo. O malo é aparcar pero xa me afarei", resalta.

Co comezo do traballo de pretempada a escasamente unha semana -o Aldasa iniciará o traballo de preparación o próximo xoves 15 de setembro ás 21.00 horas-, Avendaño xa case non pode esperar. "Ao non estar coa selección tiven un verán tranquilo aínda que estiven a adestrar pola miña conta para non perder ritmo. Si que é verdade que teño moitas ganas de empezar a correr e a tirar, mono de partidos. Tamén me gustaría coñecer xa os adestradores, saber que teñen pensado e como imos xogar, porque aos compañeiros, de xogar contra eles tantos anos, xa os teño máis vistos", finaliza a primeira fichaxe do Aldasa Amfiv para esta tempada.