O inicio da Fase polo Título de la remodelada División de Honra de baloncesto en cadeira de rodas levou ao Amfiv á cancha do segundo clasificado do Grupo 1, un Bilbao BSR que se reforzou moito e ben o pasado verán e que está a realizar unha gran tempada. O compromiso era complicado para o conxunto de César Iglesias pero salvouno con nota a pesar da súa derrota nun apaixonante e bonito partido no que calquera dos dous equipos puido facer ela vitoria. De feito, os vigueses dispuxeron dun último triplo á desesperada de Agustín Alejos que finalmente non entrou aínda que estivo moi preto de facelo e supuxese un triunfo de moito mérito para o Amfiv.

Non obstante, o comezo do partido non foi bo para os visitantes. Despois de conseguir as dúas primeiras canastras, viron como o Bilbao BSR enganchaba un parcial de 10-0 aproveitando a maior envergadura dos seus xogadores para poñer o marcador 10-4 no minuto 6. E puido ser aínda peor porque, afortunadamente para os intereses do Amfiv, o novo Amadou Diallo fallou varias accións que podían incrementar a renda local no primeiro cuarto (20-10, min.10).

O segundo período foi xa outra historia. O corpo técnico vigués apostou por premer e o equipo empezou a carburar. Ademais, en ataque apareceu a figura de Lorenzo Envó, conseguindo canastras de todas as cores, e pouco a pouco o resto do equipo empezou a sumar tamén ata chegar ao intermedio coa desvantaxe reducida á metade (37-32, min.20) e a impresión de que se non fose por un par de inoportunos erros poderían mesmo dominar no marcador.

Esas sensacións tiveron a súa prolongación na reanudación do partido tras o intermedio. O bilbaíno Txema Avendañó reclamou tamén a súa cota de protagonismo no choque ante o club no que se iniciou no baloncesto en cadeira de rodas, realizando un espléndido terceiro cuarto no que logrou 14 puntos. Así, o Amfiv puido á fin poñer de novo por diante (40-42, min.24; 44-48, min.26) pero cando xa lograra o máis complicado viu como o Bilbao pechaba o período outra vez dominando o electrónico (54-51).

O conxunto de César Iglesias xa non transmitían tan boas vibracións e encaixaba outro parcial de 10-2 que complicaba moito as cousas (64-52, min.34). Non obstante, o tempo morto solicitado polo adestrador vigués resultou moi convincente. Unha canastra de Alejos precedeu a un recital de Envó con triplo, canastra de dous, dous tiros libres e outros triplo para resucitar ao Amfiv (66-65, min.37).

Deste modo, o encontro chegou a un final igualadísimo, no que a balanza puido perfectamente inclinarse cara a un ou outro lado. Con 71-68 no marcador e 20 segundos por xogarse, Iglesias solicitou outro tempo morto para debuxar na lousa unha xogada para o triplo de Envó. O seu lanzamento non entrou pero foi obxecto de falta. Errou o primeiro tiro libre pero anotou os outros dous (71-70). Quedaban aínda 6 segundos cando Asier García visitou tamén a liña de persoal, fallando o primeiro e convertendo o segundo (72-70). Os vigueses tiveron tempo aínda para que Envó cruzase o campo e cedese a pelota para que Alejos, dende sete metros, intentase o triplo de la vitoria. O tiro estivo a punto de entrar pero a fortuna deu as costas ao Amfiv que regresa á casa con moi bo sabor de boca no seu inicio desta nova fase liguera na que se enfrontan os oito mellores da máxima categoría nacional.

BILBAO BSR - AMFIV 72-70
BILBAO BSR: Amadou (6), Rubén Viso (4), Asier García (30), David Mouriz (13), José Leep (-) -cinco inicial-, Dani Díaz (15) e Centeo (2).
AMFIV: Julio Vilas (-), Berni Costas (12), Filipe Carnero (-), Lorenzo Envó (28), Txema Avendaño (19) -cinco inicial-, Agustín Alejos (11), Samuel Rodríguez (-) e Nick Radovich (-).
PARCIAIS: 20-10, 37-32 (Descanso), 54-51 e 72-70 (final).
ÁRBITROS: Varela e Carnero. Eliminaron por cinco faltas persoais ao local Viso.
INCIDENCIAS: Encontro correspondente á primeira xornada do Grupo 2 da División de Honra de baloncesto en cadeira de rodas.