Estase mellor na casa que en ningún sitio. Isto o teñen perfectamente claro os xogadores locais do Amfiv que non dubidaron nin un segundo á hora de aceptar a oferta de renovación que lles formulou o conxunto vigués.

Así, a internacional española Vicky Alonso, que se atopa actualmente disputando o Campionato de Europa en Worcester (Gran Bretaña), Bernabé Costas, Samuel Rodríguez e Julio Vilas, ao igual que Santi Comesaña e Alberto Abalde que formarán parte do equipo filial pero con presenza tamén no primeiro equipo, seguirán defendendo unha campaña máis a camiseta do Amfiv. E xa van... Porque entre todos eles superan amplamente as cincuenta tempadas xogando para o equipo da súa cidade, para o club no que se criaron e que lles viu crecer ao longo de todos estes anos. Ningún esquece que esta tempada vai ser especial, a primeira sen Pablo Beiro, e, por iso, a súa resposta foi unánime.

Pero non só a súa. Hai outros xogadores que tamén forman xa parte da casa. Xogadores que non naceron en Vigo nin nas súas inmediacións pero que comparten o cariño dos seus compañeiros á cidade pero, sobre todo, ao club. Algún leva aquí media vida e é xa un vigués máis. Aquí vive, aquí traballa, aquí sofre e aquí goza. Ata fala galego aínda que aínda con acento sevillano. É o caso de Lorenzo Envó, todo un símbolo do Amfiv, o xogador emblema da entidade á que ha liderado os últimos trece anos. Outro, Txema Avendaño, chegou a Vigo como un paso máis nunha carreira que xa lle levara dende Bilbao a Barcelona e Toledo. Agora, o internacional español, que se atopa tamén en Worcester disputando o Campionato de Europa e buscando unha praza para os Xogos Olímpicos de Río 2016, vai cumprir a súa quinta tempada no Amfiv e se atopa plenamente asentado na cidade. E ata os recén chegados, como o mozo de Mugardos Manu Lorenzo, comparten ese sentimento aínda que no seu caso sexa moito máis doado porque dende os seus inicios no Basketmi ferrolano puido vivir e sentir a importancia do conxunto vigués non só dentro do baloncesto en cadeira de rodas senón tamén para todo o deporte adaptado en Galicia. Eles tres tampouco tiveron dúbidas e aceptaron sen titubear a súa continuidade no Amfiv.

"Afortunadamente, a xente da casa apostou por continuar no equipo xa que o noso presuposto e a nosa filosofía non nos permiten fichar un montón de xogadores foráneos. O club existe grazas a eles pero tamén para eles. O noso obxectivo continúa sendo traballar para que calquera persoa con algún tipo de minusvalidez física poida integrarse plenamente na sociedade co deporte como ferramenta. Como acontecen todos os anos, algúns deles tiñan substanciosas ofertas pero unha vez máis pesou máis o corazón que a carteira", explica o novo presidente da entidade, José Antonio Beiro, quen incide en que "vai ser a primeira tempada sen Pablo e ningún se quería ir neste momento. Estamos moi agradecidos de que sigan apostando por nós".

Con estas nove renovacións dunha tacada, César Iglesias e Óscar Carbajo xa teñen unha base para empezar a traballar na pretempada de cara á estrea ligueiro o 17 de outubro en Bouzas ante o Fundación Grupo Norte. Agora os esforzos do Amfiv céntranse en pechar as negociacións, algunhas xa moi avanzadas, para concretar os dous reforzos para esta próxima campaña. No caso do xogador clase 4 o acordo está moi próximo e podería pecharse mesmo en cuestión de horas. Mentres, para o xogador de clase baixa existe un abano máis amplo de posibilidades e aínda hai que definir a puntuación que máis interesa para sacar o mellor partido ás combinacións que ofrece o equipo do Amfiv. A intención da entidade presidida por José Antonio Beiro é concretar as dúas fichaxes antes do próximo luns para que poidan xa estar ambos os dous xogadores ás ordes do corpo técnico no inicio oficial dos adestramentos.