O Aldasa Amfiv debutará diante da súa afección este sábado e ao completo respecto ao primeiro xogo en Málaga. O club xa ten o pase internacional de Rida Maataoui.

Os esforzos da dirección deportiva do Amfiv, con José Antonio Beiro á cabeza, centráronse nas últimas datas en solucionar canto antes a situación do internacional marroquí Rida Maataoui . E as xestións realizadas por Beiro deron xa os seus froitos posto que o conxunto vigués ten no seu poder dende este martes os documentos necesarios para que o africano poida estar ás ordes de Julio Bernárdez no vindeiro compromiso do Aldasa.

Deste xeito, o técnico olívico disporá xa de todo o seu equipo para afrontar este sábado en Bouzas (18.00 horas) a segunda xornada na División de Honra de baloncesto en cadeira de rodas. Será a estrea ante a súa afección do novo proxecto do Aldasa e a primeira vez que Maataoui vestirase a súa nova camiseta. E Vicky Alonso, que non puido desprazarse a Andalucía por cuestións laborais, tamén estará.

En fronte estará un rival perfectamente coñecido pola afección local, o Gran Canaria, pero que esta tempada conta con numerosas caras novas e, a priori, parte entre o grupo de candidatos a pelexar polos primeiros postos da táboa clasificatoria. Iso si, como o Amfiv, non puido estrear a tempada con vitoria ao caer na súa casa ante o gran favorito a facerse co título ligueiro, o Fundosa ONCE, por 55-61.

"Estamos moi contentos de poder solucionar xa o tema de Maataoui para empezar a centrarnos única e exclusivamente no deportivo. O club conta xa co visto e prace da Federación Marroquí e con todos os papeis necesarios para que poida debutar este sábado, co que o corpo técnico poderá dispor de todo o grupo”, resalta o máximo responsable deportivo do Aldasa, quen destaca igualmente a dificultade do primeiro partido en casa do conxunto vigués.

“Todos sabemos que tradicionalmente o Gran Canaria é un equipo ao que é moi complicado gañarlle, sobre todo na súa pista. Pero, ademais, esta tempada parece que se reforzaron moi ben e aparecen nas quinielas como o terceiro equipo en discordia, xunto ao Fundosa e o Casa CID Murcia de Xetafe. Non será unha estrea nada sinxela ante a nosa afección, pero é que esta campaña ningún partido vai ser doado". Segundo o dirixente, "todo o mundo fichou ben e imos ter que pelexar moito por cada vitoria. Nós xa o experimentamos nas nosas propias carnes na primeira xornada. Se non estás fino, este ano podes perder con calquera. A Liga vai estar máis competida que nunca e os descoidos vanse a pagar moi caros”, puntualiza Beiro.