O Vigo Squash, campión de Galicia por equipos nas instalacións de Pontemuiños

img9032mrA pasada fin de semana disputouse en Pontevedra o Campionato de Galicia absoluto por equipos de squash, conseguindo o club Vigo Squash uns excelentes resultados.

O conxunto olívico proclamaríase campión polo tanteo de 3-0 co equipo feminino formado pola pontevedresa Sara Esperón, Raquel Domínguez, Guadalupe Lareu e Xisela Aranda, actual campioa de España absoluta individual e bolseira de VIDE.

O club vigués impúxose na finalísima ao Squash Santiago.

Anteriormente pasaron as semifinais tras gañar ao equipo A feminino do Squash Ría de Vigo por 2-1. Xisela e Sara impuxéronse nos seus encontros por 3-0. Doutra banda, Guadalupe perdeu o seu partido (0-3).

Así mesmo o equipo masculino formado por Adán López, Dani Esperón, Víctor Reguera, Nacho Merino e Adrián Santín chegaría ao cuarto posto dun total de 16 equipos masculinos. En oitavos venceu ao Ría de Vigo E (4-0), en cuartos ao Santiago D (4-0), para caer ante o Pontevedra B en semifinais (0-3 e cuarto partido sen rematar).

O título foi para o Squash Santiago, que conta nas súas filas con varios top ten nacionais. O primeiro equipo santiagués gañou o campionato tras a vitoria ante o Squash Pontevedra (4-0). Importante no Vigo Squash a baixa do internacional vigués Hugo Varela, que segue a adestrarse en Barcelona. No partido polo bronce o Vigo Squash caeu 1-2 diante do Squash Santiago B. 

O equipo B do Vigo Squash (Diego López, Alberto de Haro, Miguel Anxo Merce e Santiago Andón) realizou un magnífico papel conseguindo o subcampionato de consolacion.