Patricia Mendes e Álvaro Prieto gañan o III Circuíto Cidade de Vigo de carreiras populares

pavo2011A Subida ao Castro deixou sete días atrás practicamente vista para sentenza a clasificación da terceira edición do circuíto de carreiras populares Cidade de Vigo, pero esta mañá na Alameda aínda houbo lugar para a emoción.

Quedaba por decidir o gañador da categoría promesa-senior masculina, con máxima emoción xa que Elías Domínguez, do Ourense Academia Postal, estaba empatado a puntos con Álvaro Prieto, do Fuerteventura. O que rematase por diante se faría cos 1.200 euros en metálico do premio ao campión do circuíto. Prieto logrou o seu obxectivo e finalmente sacou 8 segundos ao seu rival e, ademais, meteulle un atleta do circuíto entre os dous, David Posada. Elías Domínguez, que foi o mellor da categoría na Vig-Bay, en San Xoán, nas Xornadas Marisqueiras do Berbés e na Vigo+11, pagou a súa ausencia da carreira da Universidade (10 kms. Cidade Universitaria), a primeira do ano, e que Prieto fose mellor na Subida ao Castro e na Alameda.

En categoría promesa-senior feminina, a portuguesa do Comesaña, Patricia Mendes, conquistou o circuíto fronte a Soledad Castro, compañeira de equipo. Resultou fundamental que a atleta mosense adestrada por Oliva Román non se inscribise na dura e peculiar Subida ao Castro; Mendes si estivo nela. Mendes, que correu mancada o Gran Premio Pedestre de Nadal para puntuar, sufriu para manter a diferenza. A vitoria de Solange Andreia Pereira (Bikila) e o segundo posto da céltica Sara Pérez, evitou que Sole metese máis atletas entre ambas e que a lusa puidese defender o liderado. Un primeiro posto que vale 1.200 euros.

Tras a Carreira do Pavo, todos os líderes das diferentes clasificacións cumpriron salvo en junior-xuvenil masculina, na que houbo cambio no primeiro posto polo paso a idade promesa de Samuel Rodríguez.

Sobre os gañadores do circuíto en 2010 só repite Carmen Costas. Daniel Bargiela, vencedor en 2009 da categoría promesa-senior, volve imporse, esta vez en veteranos 35. E en veteranos 50, José Álvarez suma o seu segundo triunfo logo de ser primeiro nesa categoría en 2009.

A entrega de premios terá lugar en xaneiro. Nesta edición, a Concellería de Deportes repartirá máis de 7.000 euros entre os tres primeiros clasificados de cada categoría, dos que 1.200 son para Mendes e a mesma cantidade para Prieto.