A I Xornada Siareira, dous debates sobre o deporte vigués e o programa Siareiros, pola que pasou este sábado no hotel Coia unha ducia de invitados e preto dun cento de asistentes, pechouse coa entrega dun premio á fidelidade de dous Siareir@s e cos premios Siareir@s 2009/2010 polos méritos da tempada anterior.

Bernardo Pérez Alonso, Siareiro irmán do atleta olímpico Carlos Pérez, e Ángela Molins Aguirre, seguidora do baloncesto feminino e do Celta Indepo, foron os recoñecidos pola Concellería de Deportes. A Fundación VIDE premiou tamén como mellor club Siareiro Base ao Club de Loita Cidade de Vigo, que preside Pérez Sousa, polo seu constante apoio ao deporte de fomación; ao Pilotes Posada, presidido por Javier Rodríguez, como mellor club Siareiro Elite (é a entidade que máis afeccionados achega); a Martín Errecalde como Voluntario do Ano; e Xisela Aranda, internacional e xogadora do Vigo Squash, recibiu o Premio ao esforzo por conquistar a tempada pasada o número 1 do ranking estatal de squash e gañar o Campionato de España e a Copa de España.

Durante a xornada, clausurada pola directora xerente de VIDE, Laura Magdalena, o concelleiro de Deportes, Xabier Alonso, e o tenente de alcalde de Vigo, Santiago Domínguez, tiveron voz todos os sectores do deporte, dende empresas patrocinadoras ata afeccionados, pasando por federativos, xogadoras e dirixentes de clubs de elite e base, ou medios de comunicación.