O Campionato de Vigo de tenis conclúe este domingo no Complexo Deportivo de Samil coa disputa de nove finais en catro quendas e un balance de 239 partidos xogados ao longo de dúas semanas.
O alcalde de Vigo, Abel Caballero, e o concelleiro de Deportes, Manel Fernández, asistirán á xornada final, amosando o apoio municipal a este histórico evento, que cumpriu este verán 71 edicións.
A organización deixou as mellores finais, as tres absolutas (masculina, feminina e dobres masculino), para as 18:00 horas, e espérase unha boa asistencia de público nun día de sol e caloroso.
O apoio do Instituto Municipal de Deportes, que asinou un convenio coa Federación Galega de Tenis, permitiu a esta dispor das pistas de forma gratuíta. Con ese acordo, rubricado hai un mes polo presidente do IMD e concelleiro de Deportes, Manel Fernández, e o seu homónimo da federación autonómica, José Antonio Pereiro, o Concello deixou sentado o seu respaldo a esta tradicional competición.