A primeira edición da carreira popular 10 km Praia de Samil, prevista para esta mañá, foi suspendida por razóns meteorolóxicas e recolocarase nunha nova data, do mesmo xeito que o resto de actividades paralelas que comprendía a xornada deportiva programada en Samil.

A organización atendeu con urxencia o aviso de Protección Civil comunicando a Alerta Laranxa na costa, con ventos de 100 quilómetros por hora, e tamén da Policía Local.

Así, dende a derradeira hora de onte á noite púxose en contacto cos atletas inscritos a través dun correo electrónico masivo, para facerlles chegar a decisión de suspender as carreiras e de desprazalas a unha nova data.

"Sería unha irresponsabilidade pór en risco a integridade dos asistentes a un evento deportivo ao aire libre en zona costeira", sinalouse por parte dos responsables da carreira. A cancelación tamén se anunciou na web do evento (http://www.10kpraiadesamil.com) en canto tomouse a decisión.

A organización da Media Maratón de Vigo, que é a que traballou para que esta proba resultase un éxito, conseguira 1.041 inscricións de pago para o 10.000 urbano e máis de 400 nenos e nenas inscritos nas outras actividades previas. Era a carreira do ano, con saída e remate en Vigo, con máis inscricións. Garantir a seguridade de mozas e adultos levou a tomar a decisión, seguindo as recomendacións de Protección Civil.

Dende a organización anúnciase que nesta mesma semana buscarase unha nova data para recolocar todo o programa deportivo previsto, atendendo ao calendario atlético galego e tamén ás probas de calquera tipo fixadas na cidade e en especial en Samil. Os dorsais xa retirados polos e polas atletas ao longo do serán do sábado servirán para a nova data. Os organizadores puxeron un teléfono a disposición dos participantes (651.313.779) para atender de forma directa as dúbidas que estes teñan e estiveron toda a mañá no punto de recollida de dorsais para informar in situ. Ademais, afírmase dende o comité organizador que se devolverá o prezo da inscrición a quen o desexe.

A organización, que se mantivo permanentemente en contacto co concelleiro de Deportes, Manel Fernández, e cos seus patrocinadores para informarlles do ocorrido, quere agradecer aos e ás participantes a súa comprensión por este contratempo.