A Fundación Vigo en Deporte recibiu o visto e prace do comité organizador do Campionato do Mundo universitario de taekwondo para que os membros do programa Siareiros, tanto de Elite como de Base, dispoñan de entradas de balde.

Serán un cento de entradas diarias para asistir de forma gratuíta ao evento, o de maior participación da historia, con 48 seleccións, aínda que falta o derradeiro reconto oficial de equipos, porque os representantes algúns países aínda estaban por chegar hoxe mesmo.

O proceso é cómodo para o siareiro: no horario de verán da Fundación VIDE (de 8:00 a 15:00 horas), o seguidor ou seguidora pode recoller as entradas sen custo (unha por persoa). Para VIDE non é esta a primeira experiencia de acordos con eventos que benefician aos socios do programa Siareiros, que apoia aos clubs da cidade.

En xaneiro, durante a Supercopa de España de fútbol sala, varios centos de Siareiros presenciaron semifinais e final de forma gratuíta. O Campionato do Mundo, que empezou hoxe mércores, disputarase ata o domingo no pavillón central das Travesas.

As entradas, no despacho de localidades, custan 5 euros cada día (entrada única para todas as idades), mentres que o abono para todo o campionato é de 12 euros.