Os vigueses deixaron escapar un encontro que parecía ter perfectamente controlado cando a falta de pouco máis de dous minutos dominaban 54-50 con dous tiros libres e banda ao seu favor. Pero a sucesión de erros e precipitacións dos locais na recta final provocaron que o triunfo se fose para Toledo (54-57).
É difícil explicar como un equipo que empeza gañando 12-0 e que salvo no último segundo do terceiro cuarto (38-39) dominou o marcador do partido durante 38 minutos pode deixar escapar unha vitoria importantísima para manter as súas aspiracións de loitar pola terceira praza e reforzar a candidatura para o cuarto posto. É complicado entender como con catro puntos de renda, dous tiros libres e banda a favor a pouco máis de dous minutos para o final un equipo pode encaixar un parcial de 0-7 e estar aínda a preguntarse por que o triunfo se foi a Toledo. Aínda que o seu técnico, Abraham Carrión, si que ten unha explicación. "Faltounos o grao de madureza necesario para estar á altura cando o partido se pon duro fisicamente. Sabiamos que os árbitros estaban a deixar meter o carro e as mans no últimos cuarto e non soubemos mover a bóla para non perder balóns importantes, permitindo os seus roubos e canastras. En canto o Funhpaiin endureceu a súa defensa, nós esquecemos o que debiamos facer. Teremos que aprender que se nos pegan, temos que pensar porque, pola contra, en Europa o imos pasar mal", analiza Carrión.
O caso é que esquecendo eses últimos minutos e obviando o feito de que gañou Toledo, o Aldasa fixo un bo encontro, brillante por momentos. Por exemplo, os seus instantes iniciais. Partindo dunha boa defensa, os locais puideron realizar rápidas transicións para enganchar un parcial de 12-0, obrigando o técnico do Funhpaiin a parar a sangría cun tempo morto. O minuto e medio de parón veulle moi ben aos visitantes, que se asentaron sobre a pista e empezaron a anotar con máis fluidez para volver ao partido (17-14, min.10).
O Amfiv atascárase e os toledanos non só equilibraban o marcador senón que ameazaban con tomar a dianteira (19-19, min.13). Non obstante, a entrada en pista do pívot mexicano Lalo deu outro aire ao conxunto de Abraham Carrión. Con oito puntos no cuarto, foi o grande artífice de que os vigueses recuperasen o mando (29-21, min.18) e de que puidesen irse en vantaxe ao intermedio (31-25, min.20).
Na reanudación, o partido empezou a cambiar e a volverse en contra do Aldasa. O Fuhnpaiin deu unha volta de rosca á súa defensa, subindo moito a intensidade, aínda que nesta ocasión era a velocidade do finlandés Leo Pekka Tahti a que permitía aos anfitrions incrementar mesmo a diferenza ao seu favor (37-30, min.27). Para completar as boas noticias, Ian Sagar, a principal referencia ofensiva dos visitantes, cometía a súa cuarta falta persoal e tiña que irse ao banco. Pero cando mellor pintaban as cousas para o conxunto local, un inesperado parcial de 1-9, culminado cun triplo de Leep case sobre a bucina, colocaba os toledanos por diante por primeira vez no choque (38-39, min.30).
Cinco puntos consecutivos de Lorenzo Envó volvían poñer as cousas no seu sitio (43-39) e a axuda de Lalo permitía mesmo recuperar os seis puntos de renda (47-41, min.34). Os constantes intentos visitantes por achegarse (49-48, min.36 e 51-50, min.37) atoparon senllas respostas do pívot internacional mexicano do Aldasa, primeiro cunha canastra baixo taboleiro e logo cun triplo para deixar o marcador 54-50 a pouco máis de dous minutos para o final. Entón chegou o momento decisivo do encontro. Os locais roubaron un balón e a súa rápida saída á contra foi parada cunha falta antideportiva. Dous tiros libres e banda para deixar o choque case sentenciado. Moi poucas veces unha situación a priori tan favorable resultou tan negativa para un equipo. Os vigueses desaproveitaron a ocasión e empezaron un carrusel de erros e precipitacións que deu aire ao Fuhnpaiin. Porque os visitantes demostraron entón por que ocupan o terceiro posto na táboa e só perderon esta tempada con Fundosa Once e Once Andalucía. Cando parecía complicado, aumentaron un pouco máis aínda a súa agresividade defensiva e a súa intensa presión non atopou resposta nun desorientado Aldasa. Os visitantes, ao contrario, souberon controlar mellor os seus nervios para enganchar un parcial de 0-7 no momento máis oportuno e levar o triunfo (54-57) ante un equipo local que aínda non lograba entender como lle escapara a vitoria.
FICHA TÉCNICA
ALDASA AMFIV: Bernabé Costas (6), Santi Comesaña (-), David Mouriz (6), Agustín Alejos (3), Lorenzo Envó (15) -cinco inicial-, Xullo Vilas (2), Moncho Pombo (-), Lalo (16) e Leo Tahti (6).
FUHNPAIN PERALEDA: Fran Lara (2), Ian Sagar (9), Asier García (8), Joseph Leep (6), Orogbeni (3) -cinco inicial-, Chema Avendaño (15), Luismi Marquina (14).
PARCIAIS: 17-14, 31-25 (descanso), 38-39 e 54-57.
ÁRBITROS: Mar Gil e Jorge Marqués. Sen eliminados.
INCIDENCIAS: Encontro correspondente á décimo quinta xornada da División de Honra de Baloncesto en Cadeira de Rodas disputado no Pavillón de Bouzas ante a presenza de preto de 300 espectadores.