A dupla do Club do Mar San Amaro, formada polo herculino Carlos Fernández e o vigués Jacobo Fernández, logrou o ouro, na proba de dobres masculinos, no Máster Nacional de Novos sub-13 de bádminton, que se disputou en terras do Principado de Asturias a pasada fin de semana.

Carlos e Jacobo lograron o primeiro posto do grupo A, resolvendo os seus dous enfrontamentos con dúas cómodas vitorias fronte a parellas navarras e asturianas. O primeiro posto do grupo dáballes acceso directo aos cuartos e final onde tiveron como rivais á parella do CB Estella Robledo/Vovchenco aos que derrotaron por un claro 21-12/21-11. Xa na xornada do domingo, esperábanlles en semifinais os guipuzcoanos Igartua/ Zuazola, aos que venceron por 21-9/21-17. Na gran final enfrontábanse aos cabezas de serie nº 2, os ovetenses Álvarez e Murciano. Foi o encontro máis disputado que tiveron que en todo o fin de semana e onde tiveron que despregar o seu mellor bádminton para alcanzar o título, derrotando finalmente os xogadores do CB Oviedo por 21-16 / 21-19.

Os galegos logran así o segundo ouro da tempada das dúas probas que se disputaron a nivel estatal, e manteñen folgadamente o primeiro posto do ranking nacional de dobres sub-13.

Na proba individual, Jacobo Fernández superou a fase de grupos e os oitavos de final con comodidade, pero caeu derrotado, no que constituíu a sorpresa da fin de semana, fronte ao vasco Martín Zuazola en tres disputados sets por 17-21 / 21-17 / 14-21.

Na categoría sub-17, na proba de dobres, o seu irmán Gabriel, alcanzaba un meritorio quinto posto formando parella co asturiano Sergio Álvarez, sendo derrotados en cuartos de final polo escocés Wadell e o madrileño Molares por 14-21/19-21.

Manel Fernández, como máximo responsable do Deporte vigués, mostrouse satisfeito con este novo triunfo do novo deportista, que confirma a súa traxectoria ascendente.