Do 26 ao 29 deste mes, un total de 118 equipos de 36 clubs disputarán o VII Torneo de Nadal Concello de Vigo, fundamentalmente vigués (27 clubs) pero que tamén convoca nas súas cinco categorías (prebenxamín, benxamín, alevín e feminino en fútbol 8 e infantil en fútbol 11) a equipos de Monçao (Portugal), Val Miñor, O Porriño, Ponteareas e Cangas, ademais do Deportivo, Lugo, Ponte Ourense e Oporto para o "Super 6" alevín do sábado 28.
O alcalde de Vigo anunciou o evento de fútbol 8 e fútbol 11 para nenos e nenas de 5 a 13 anos, que se desenvolverá en cinco campos (A Pirucha, Meixoeiro, A Bouza, Pahiño e o Federativo de Coia) do xoves 26 ao domingo 29 deste mes, poñendo o colofón a unha excelente campaña do fútbol vigués. Na presentación estivo acompañado por representantes de varios clubs (Valladares, Sárdoma, Alertanavia, Coya, Arenas de Alcabre, Nieto e San Miguel), polo presidente de Afavi e coordinador da competición (Daniel Costas), pola RFGF (Fernando Iglesias e Delfín Alonso), o edil de Deportes, Manel Fernández, e polas futbolistas Ana Iglesias (Valladares) e Laura Martínez e Ildara Pérez (Sárdoma).
"O fútbol é un deporte apaixonante e queremos vivilo singularmente no Torneo de Nadal", dixo o rexedor, que agradeceu tamén o apoio dos patrocinadores privados Hyupersa, Frutas Nieves, Gadis e New Balance, firmas que están con este evento ao que lle da pulo o Concello. Ao acto acudiron por elas Juan José Paz (Hyupersa Vigo), Juan Andonegui (Frutas Nieves) e Pablo Tojeiro (New Balance).
Co cadro feminino como novidade (xogadoras nacidas antes de 2007), equiparándose así o campionato á Vigo Cup estival de fútbol 7, Caballero celebrou que once equipos pelexen polo triunfo na categoría feminino, entre eles a representación do fútbol vigués na 1ª División Nacional (Sárdoma e Valladares).
O alcalde indicou que o campionato reunirá uns 1.800 participantes: "Unha gran mobilización deportiva mesmo cando Vigo é lugar de atención de todo o mundo", subliñou.
Grupos e categorías do VII Torneo Nadal Concello de Vigo
Fase previa infantil - fútbol 11
Horarios e xogos do torneo autonómico alevín
Tódolos cadros da fase final de fútbol 8 e fútbol 11
Regulamento do Torneo de Nadal 2019