O pavillón central das Travesas rexistrou un cheo no segundo partido da Supercopa (3.500 espectadores) e na final do evento (3.800). Nesas grandes entradas estivo presente o carné de Siareiros Elite, pois segundo informa a organización do evento, o Concello de Vigo e a Liga Nacional de Fútbol sala, medio milleiro de siareiros, ata completar capacidade, accedeu de forma gratuíta aos partidos na suma das dúas xornadas (uns 250 o xoves e outros tantos na final do venres).

O éxito do campionato foi tal que se esgotou todo o papel en venda anticipada nos despachos de billetes (tanto os abonos das dúas xornadas como as entradas de cada un dos dous días) e o polideportivo ofreceu á audiencia de todo o país un aspecto extraordinario. Con 2.900 espectadores na primeira semifinal ElPozo-Barcelona e 3.500 na segunda semifinal, a finalísima acadou os 3.800 afeccionados, o máximo da capacidade do coliseo vigués.

Non é a primeira vez que a Fundación VIDE logra un acordo deste tipo. Durante o Campionato do Mundo de hóckey a patíns, no Ifevi en xullo de 2009, os Siareiros Elite entraron de balde á primeira fase do torneo e tiveron descontos para a fase final.