A vixésima xornada do Grupo 1 da Segunda División B concluíu coa vitoria do Mosteiro Bembrive ante o Cistierna leonés por 0-6, nunha xornada enchida de sorpresas. O equipo de Pitu, moi concentrado do primeiro ao último minuto, resolveu con contundencia un encontro que marchou ao descanso con marcador de 0-2, tras unha extraordinaria actuación da súa segunda rotación.

Os tantos foron a cargo de Marío García e Berni, ambos os dous de xogada de estratexia.

Tras a reanudación, o Bembrive seguiu imprimindo un grande ritmo, sen dar opción a un Cistierna que se entregaba ante a superioridade dos vigueses. Os goles de Borrajo, Eloy, Jacobo e Mario sentenciaban o encontro e permitían ao Bembrive botar a vista ao que estaba a suceder nos pavillóns onde competían os seus rivais directos.

E o que se atoparon non puido ser mellor para os intereses dos vigueses. Cando todo parecía decidido, a competición vólvese máis interesante que nunca tras a derrota do líder Cidade de Narón ante o terceiro clasificado, Universidade de Valladolid, que sitúa aos vigueses novamente a un punto dos playoff polo ascenso cando soamente restan dúas xornadas para o final da tempada regular.

Na próxima xornada os vigueses reciben o correúdo Pizarras Tres Cuñados de O Barco mentres que o líder viaxará a terras salmantinas para enfrontarse nunha difícil saída ao Albense. En caso de que o Bembrive consiga a vitoria na casa, un empate ou unha derrota do Cidade de Narón auparían aos vigueses ao primeiro posto da clasificación.

Ademais, a derrota do cuarto clasificado Noia na súa visita aos segovianos do Cuellar, permite ao Mosteiro quedar a un só punto de clasificarse matematicamente para disputar unha nova edición da Copa do Rei e Copa Xunta de Galicia, premio ao que dan acceso os tres primeiros postos.

Esta apaixonante penúltima xornada disputarase este sábado ás 18:00 no pavillón de Bembrive.

Cistierna 0 -Cinco Inicial: Miguel, Javi Fernández, Rodrigo, Adrián Moreno e Cristian. Tamén xogaron Jesús Sánchez, Jairo, David, Del Blanco e Sergio Llanos.

Bembrive 6 -Cinco Inicial: Fiou, Borrajo, Joni, Eloy e Jacobo. Tamén xogaron Nené, Berni, Mario, Marío García, Bruno, Carlos Cora e Cuca.

Goles: 0-1 María García mín. 8, 0-2 Berni mín. 14, 0-3 Borrajo mín. 24, 0-4 Jacobo mín. 26, 0-5 Mario mín. 32, 0-6 Eloy mín. 37.