O Vigo Stick mantén as súas ilusións de saír na OK Liga Feminina por vez primeira na súa historia. O primeiro encontro oficial do campionato está marcado para o 17 de outubro.

Enrique Urdiales, presidente da entidade, e Marta González, presidenta do histórico Traviesas, club que garda unha vinculación con aquel, mantiveron o martes unha reunión de traballo para valorar todas as accións realizadas nas pasadas semanas e a mensaxe é moi optimista, aínda que se deron unha marxe "oficial" de quince días para poder garantir o orzamento da formación feminina.

O Vigo Stick está inscrito na OK Liga feminina dende xullo, con calendario sorteado (17 de outubro, a primeira xornada en Igualada), e traballa para pechar un patrocinador, necesario pola obriga de desprazarse ata en dez oportunidades a Cataluña.

“Este ano imos apostar polo equipo femenino”, dixo Urdiales tras a xuntanza, que ademais descarta de forma definitiva a entrada do conxunto masculino en Primeira División pola vacante do Cerdanyola. O Vigo Stick asume que é “inviable polo aspecto económico” afrontar nestes tempos a xestión de dous equipos á vez en competicións nacionais. Polo tanto, agora é o turno para as rapazas. Urdiales ten o firme convencimento de que o futuro é o hóckey a patíns feminino e vai apostar por el. De feito, os tres últimos anos o histórico Cidade de Vigo tivo versión feminina.

Baixo a presidencia de Marta González, o Traviesas lidera a base do hóckey a rodas local e nutre ao Vigo Stick. Hai meses, o VSK Traviesas Josmar quedou campión galego 2009/2010 (sete vitorias, dous empates e unha derrota na Coruña fronte ao Liceo), gañándose o dereito deportivo a disputar a fase de ascenso a OK Liga xunto co Liceo Coruña femenino. Non houbo fase, que quería organizar Vigo, por falta de interese doutros campións, e a FEP deu as prazas de ascenso aos dous equipos galegos, aínda que o Liceo de Eduardo Lamas decidiu renunciar a subir.

A OK Liga feminina é unha competición a dobre volta programada para catorce equipos, trece a día de hoxe. Da campaña anterior caéronse o Claret sevillano (que podería ser o decimocarto), o Mieres asturiano e o Santa María do Pilar madrileño; no seu lugar subiron o Vigo Stick e o Xirona. No campionato hai dez equipos cataláns, un galego (Vigo Stick Traviesas), un asturiano (Biesca Xixón) e un madrileño (Alcobendas).

O hóckey a patíns feminino, en Vigo dende 1953. Esta modalidade ten a súa traxectoria, de hai medio século, e o torneo paralelo que a organización montou durante as datas do Campionato do Mundo masculino Vigo 2009 simplemente foi un paso máis que reflectiu dende o respecto o seu crecente e recuperado interese. Talvez a historia non sexa o máis xusta, pero como amosa mergullando na valiosa hemeroteca municipal, esta disciplina tiña o seu oco nas páxinas deportivas dos diarios en 1953. Vigo Sporting Club e Club Patín contaban con equipos masculinos e femininos nunha cidade na que entre os equipos masculinos tamén se atopaban o Club Deportivo Silva e o Olimpic. Aquel verán, a actividade dos equipos femininos era tal que ademais dos amigables programados, as mozas disputaban o I Trofeo Parque Las Cabañas o 3 de setembro. Por que destacar este torneo e non outros? Porque o feito en si debese considerar certamente relevante. A pista de Las Cabañas, privada, era a instalación utilizada polo hóckey a patíns e, por exemplo, o baloncesto; entón, que os donos do recinto situado en Torrecedeira tivesen en conta un deporte entre mulleres en anos difíciles, di ben ás claras que ditos partidos funcionaban.

Marina, Conchita, Mariblanca, Maribel, Juane ou Toñita formaban no Vigo Sporting, fronte a Pebida, Amelita, Lolín, Cristina, Geni ou Mariluz. A súa rivalidade chegou a trasladarse á outra beira da Ría, pois a Moaña desprazáronse en barco para xogar no parque Lestón. Medio século despois, Castrelos HC, Ureca Caixanova ou Vigo Stick representaron sen ningunha dúbida a puxanza das novas xeracións.

Os últimos anos. O Castrelos logrou varios campionatos galegos, a organización do Trofeo Cidade de Vigo incluíu no programa das tres últimas edicións a versión feminina do torneo (o Ureca vigués gañou a primeira, o Noia Freixenet a segunda e o Vigo Stick a terceira) e a celebración durante o Mundial 2009 dun torneo de promoción feminino, a Copa Vigo, confirman que hai futuro e, sobre todo, escaparate. Seis equipos, Noia Freixenet, Vigo Stick Travesas, Ureca Caixanova, Compañía de María Coruña, Club Patín Mieres e ACR Gulpilhares (Portugal) competiron nunha liguiña a unha soa volta, utilizando polas mañás as dúas pistas mundialistas ademais do histórico pavillón do Carmen. O VSK rematou terceiro por detrás do Noia e o Mieres, da OK Liga. Postos novos piares, quen sabe o que o futuro deparará: lembren que o adestrador Carlos Feriche, tricampión do mundo absoluto con España en 2005, 2007 e 2009, foi antes campión mundial coa selección feminina.

O Castrelos disputou os anos 2000, 2002 e 2004 o Campionato de España senior feminino, mentres que o Vigo Stick xogouno en 2004, 2005, 2007 e 2008 e o Ureca do 2004 ao 2007. Na Copa da Raíña, o Vigo Stick estivo na primeira edición (2006). O Vigo Stick xa ten experiencia de xogar diante de equipos de primeiro nivel. E iso que a liga galega comezou no ano 1993.