O Vigo Stick xogará esta fin de semana un dobre compromiso na OK Liga Feminina, que comeza cun desprazamento en avión a Cataluña para enfrontarse ao Fontanellas i Martí Igualada o sábado (20:15 horas) e ao Sferic Terrassa o domingo (12:00 horas).
Quique Urdiales, presidente do Vigo Stick, presentou este novo proxecto deportivo na elite que o club pode afrontar co descenso do equipo masculino a competición autonómica. Era inviable ter os dous equipos arriba, dixo. O VSK, cuxa formación masculina competiu na OK Liga nas tempadas 04/05 e 06/07, xa dispuxo de varias posibilidades de xogar este campionato e de feito inscribiuse no da tempada 2007/2008, pero finalmente a FEP tivo que atrasar un ano a competición ao non cubrir o número de equipos necesario.
"Agora é o momento delas e esperamos que o equipo masculino volva nun ano á Primeira División". Urdiales lembrou que "isto non é espontáneo", e afirmou que nos dez últimos anos Vigo ten unha historia no hóckey a patíns co Castrelos (participou no Campionato de España senior de 2000, 2002 e 2003), Ureca (disputou os de 2004, 2005, 2006 e 2007) e o propio Vigo Stick (2004, 2005, 2007 e 2008), que lidera actualmente o hóckey feminino en Galicia en xeral e Vigo en particular. Destacan o cuarto posto do Castrelos en Ordes 2002 e o mesmo lugar do Ureca en Coslada 2005. De feito, o primeiro partido feminino de hóckey sobre rodas disputouse en Vigo en 1953.
Para o presidente, esta disciplina, na que España é campioa de Europa e terceira do mundo, ten un potencial tremendo e "trátase dun premio ás nenas que conseguiron este ascenso e que levan xogando moitos anos. Afrontamos a tempada cos patrocinios institucionais, o último de Galicia Calidade, e algunhas empresas". O adestrador será Leonardo Adrián Torres, "Tomba" (Arxentina, 15 de xullo de 1973), que releva a outro xogador do equipo masculino, Ángel "Pibe" Alonso e que compaxinará a dirección técnica, aínda que sempre prioritaria, coa disputa da Liga Galega senior masculina ás ordes de Jorge Urdiales. "É a nosa aposta máis importante porque ten o coñecemento necesario e os fundamentos técnicos; custounos convencelo porque para el é un reto, pero teño moita fe na progresión deste grupo", afirmou Urdiales.
Un reto. Tomba, pola súa banda, dixo que "vai ser un camiño bastante complicado", e explicou que a competición española é a máis forte do mundo. "O hóckey feminino creceu estes anos a pasos axigantados; Arxentina acaba de gañar o Mundial en Alcobendas e das súas dez xogadoras sete quedan en España". O adestrador arxentino con pasaporte italiano aplaudiu "o esforzo das miñas xogadoras para compaxinar os adestramentos cos seus traballos e estudos e confirmou que a competición será tamén para el un reto difícil porque é a primeira vez que adestro e ademais fágoo na elite. Tomba está encantado coa idea e recorda que alguén como Carlos Figueroa, "que o gañou todo como adestrador de Barcelona, Igualada e Reus, adestrou ao Vilanova feminino a pasada tempada". O propio seleccionador absoluto masculino, Carles Feriche, gañou un Mundial feminino con España.
Primeiros rivais. Segundo Tomba, "o Igualada ten un equipo curto e fichou á ovetense Susana Pandavenes, mentres o Sferic é un equipo de moito nivel". O Igualada venceu en amigable ao Noia (3-2) esta pasada fin de semana. Para Urdiales, "comezar fora é bo porque na terceira xornada xa xogarán en Bouzas téndose quitado o medo".
Nova xogadora e aforro. O dirixente vigués anunciou unha terceira fichaxe para o grupo, a porteira viguesa Patricia Echarren, que estes anos xogou a OK Liga e tamén no Rivas (a imaxe, da Copa da Raíña 2008 co Rivas) fronte ao Voltregá. Disputar dobre xornada en Cataluña unha mesma fin de semana suporá para o club un aforro de máis de 4.000 euros.