O Blusens Networks Universidade de Vigo Rugby venceu onte no campo de As Lagoas Marcosende ao AVIA Eibar por 20 a 17, no que actuaron dous exxogadores vigueses, e que deixaron grandes recordos no club, como Jon Arrizabalaga e Gastón Ibarburu, nun partido no que conseguiu un bonus ao pousar catro ensaios.

O encontro empezaba ben para o equipo vigués que pousaba aos 4 minutos por medio de Jesús Moure na bandeira, tras un maul á saída dunha touche. Uruburo non pasaría a transformación, un detalle que sería unha constante ao longo do partido, no que o Blusens Networks chutó 6 patada, 4 transformacións e 2 golpes, e non logrou pasar ningunha entre os paus. Os primeiros minutos foron moi parellos, coa resposta vasca no 7, con ensaio de García e transformación do medio loita Gaizka Arrizabalaga. Replicaría Uruburo no 10 cun ensaio no que arrancou dende os seus 22 e deixou a medio equipo do AVIA Eibar detrás, zigzagueando todo o campo, para poñer de novo a vantaxe en 10 a 7. Non duraría moito a alegría nas bancadas de As Lagoas, nun día espléndido de sol, xa que no minuto 20 Gorka Moya pousaría o seu ensaio para adiantar ao seu equipo novamente no marcador e deixar o parcial ao descanso por 10 a 12, que remataría anecdóticamente co cronómetro no minuto 35, sen os descontos, segundo se entendeu por un fallo á hora de marcar o inicio do partido.

A segunda parte sería practicamente de dominio viguesa, que non se reflectía no marcador, produto dos fallos aos paus, e á hora de tomar decisións ou xogar á desesperada os golpes de castigo, e a falta de definición nos últimos metros. Pero o Blusens Universidade de Vigo era superior no campo, ante un novo e aguerrido Eibar Taldea que pousaría aos 2 minutos da reanudación e deixaba aos vigueses por debaixo 10 a 17. A partir de aí o control, tanto de xogo como territorialmente, pasaría a mans viguesas, sumando un novo ensaio de Uruburo e outro dun dos xogadores destacados do partido, David Redondo, para pechar o partido e dar o bonus que permite sumar 5 puntos pola vitoria. A nota negativa foi a saída por unha lesión no ombro esquerdo de Carlos de Cabo, que espera diagnóstico para coñecer o alcance.

Na clasificación o Blusens Networks Universidade de Vigo sitúase cuarto, malia contar con 2 partidos menos, nunha liga que domina Aparejadores de Burgos con puntaje ideal de 25 puntos, seguido cun menos por Zarautz, que gañou a CRAT UDC por 24 a 8. O equipo vigués viaxa o próximo sábado a Valladolid para enfrontarse a VRAC Quesos Entrepinares B que se sitúa na última praza cunha vitoria en 4 partidos.

Fotografía de Jorge Castro.