Tardou once meses e percorrido máis de 41.000 quilómetros pero finalmente, a botella coa mensaxe dos nenos do Vigo Rugby ao ex xogador dos All Blacks, Jonah Lomu chegou ao seu destino.

A entrega ao universalmente famoso Jonah Lomu tivo lugar este domingo, 21 de febreiro, no transcurso do partido entre o Sporting Club Mazamétain e o Marseille Vitrolles Rugby, equipo no que se atopa actualmente o ex All Black. Jean Marc Foucras, ex adestrador do Castres, foi o encargado de entregarlle a botella a Lomu.

Lomu mostrouse moi sorprendido pola iniciativa e afirmou que a carta dos rapaces do Vigo Rugby o emocionara porque nunca recibira unha mensaxe tan conmovedora.

Nun extracto da súa resposta, o mellor xogador de rugby de todos os tempos afirma: "tedes que ser fortes e seguir loitando polo que queredes, só con traballo e constancia poderedes conseguir os vosos obxectivos".